Píluvinir efna til Nesskipsmótsins í kvöld, föstudaginn 27. janúar. Mótið verður í félagsheimili KR og rennur ágóðinn af því til meistaraflokks karla vegna æfingaferðar. Mæting er í síðasta lagi kl. 20 segir í skilaboðum frá fulltrúa meistaraflokks karla.

Verðlaunin eru glæsilegir bikarar og úttekt í Melabúðinni.

KR og Víkingur skildu jöfn í annarri umferð Reykjavíkurmótsins í kvöld, lokatölur urðu 3-3. Mörk KR skoruðu Viktor Bjarki Arnasson, Óli Pétur Friðþjófsson og Atli Sigurjónsson. KR-ingar eru þar með komnir á blað í Reykjavíkurmótinu, en hefðu nú átt að taka stigin þrjú í kvöld.

•  Sóknarleikur KR liðsins var betri í kvöld en í leiknum á móti Fram. Menn voru sneggri að losa boltann í góð hlaup og þá var meiri ógnun bakvið varnarlínu andstæðinsins í kvöld en í síðasta leik. Liðið getur haldið boltanum vel en þarf að passa upp á það að missa ekki boltann að óþörfu á hættulegum stað og tíma.
• Varnarleik KR liðsins þarf að laga. Menn þurfa að bera meiri ábyrgð, tala meira saman og klára sín verk í varnarleiknum. Liðið vinnur oft boltann hátt á vellinum með góðri pressu, en þegar pressan virkar ekki slitnar of oft á milli manna í varnarleiknum. Góðu fréttirnar eru þær að það er janúar svo það er nægur tími til þess að kippa þessu í lag.
• Haukur Heiðar Hauksson og Dofri Snorrason náðu vel saman á hægri vængnum. Þeir komust trekk í trekk bakvið bakvörð Víkinga og sendu góða bolta inn í teiginn. Þar hefðu mátt koma ákveðnari hlaup og meiri gæði í afgreiðslur. Mark Óla Péturs kom þó eftir glæsilega sókn þar sem Haukur Heiðar komst upp að endamörkum, setti þéttingsfastan bolta inn á teiginn og Óli Pétur kom með kraftmikið hlaup og kláraði færið vel.
• Gunnar Þór átti fínan leik í vinstri bakverðinum og þá var gaman að sjá Óskar Örn byrja leikinn og vera með af fullum krafti í fyrri hálfleiknum. Þá átti Viktor Bjarki góðan dag og skoraði laglegt skallamark eftir fallega sendingu frá Skúla Jóni.
• Atli Sigurjónsson kom vel inn í leikinn í seinni hálfleiknum. Atli spilaði boltanum fyrr og betur frá sér en í leiknum á móti Fram og þá voru sendingar hans markvissari. Atli kórónaði svo góða innkomu sína með glæsilegu marki. Atli fékk þá boltann á vítateigshorninu og sneri hann á hárnákvæman hátt í stöngina og inn.
• Næsti leikur KR er sunnudaginn 29. janúar á móti Leikni.

KR mætir Víkingi á morgun, miðvikudaginn 25. janúar klukkan 21.00 í annarri umferð Reykjavíkurmótsins. Leikurinn fer fram í Egilshöll í Grafarvogi. KR beið lægri hlut í fyrstu umferðinni á móti Fram og eru staðráðnir í að koma sér á blað á mótinu. Rúnar Kristinsson sagði í léttu spjalli við KRReykjavik.is að það væri aldrei gott að tapa, en það eina jákvæða við tapið á móti Fram væri að sjá þá veikleika sem eru í liðinu á þessum tímapunkti og geta unnið í þeim fram að Íslandsmóti. Rúnar sagðist samt aldrei vera sáttur við að tapa sama í hvaða móti eða á hvaða tímapunkti það er og því kæmi ekkert annað en sigur til greina í leiknum á morgun.

Föstudaginn 27. janúar verður pílukvöld í félagsheimili KR-inga, en þau eru haldin reglulega af Píluvinum KR. Þetta föstudagskvöldið rennur ágóði kvöldsins hins vegar til styrktar æfingarferðar meistaraflokks karla. Velunnarar pílunnar í KR sem og knattspyrnunnar í KR ættu því að fjölmenna í félagsheimili KR þetta föstudagskvöldið og gera sér glaðan dag í góðra vina hópi.

Sparkspekingurinn og pacmansnillingurinn Páll Sævar Guðjónsson hefur hnoðað saman í draumalið sitt skipað leikmönnum KR sem hrifið hafa hann í gegnum tíðina. Flestir KR-ingar þekkja hljómfagra rödd Páls Sævars, en hér fá stuðningsmenn KR innsýn inn í hugarheim mannsins með hinna seiðandi rödd.

Halda áfram að lesa "Draumalið stuðningsmanna KR"

Tískumógúllinn Viktor Bjarki Arnarsson á afmæli í dag 22. janúar. KRReykjavik.is óskar Viktori Bjarki innilega til hamingju með daginn og vonar að dagurinn verði Viktori ánægjulegur.